Ҳудудлар масаласини Украина халқи ҳал қилиши керак — Зеленский

 

Украина президенти Владимир Зеленский ҳудудларга доир ҳар қандай масала бўйича якуний қарор Украинада сайлов ёки референдум орқали халқ томонидан қабул қилиниши зарурлигини таъкидлади. Бу ҳақда президентнинг сўзларини АФП ахборот агентлиги келтирмоқда дейди Lenta.ru нашри.

 

Президентнинг бошқа баёнотларида қуйидагилар қайд этилган:

 

АҚШ ва Россия Донетскни “эркин иқтисодий ҳудуд” ёки “демилитаризация қилинган зона” сифатида атамоқда, бироқ уни ким бошқариши масаласида аниқлик йўқ. Зеленскийга кўра, келишувнинг асосий шарти — Россия қўшинларининг ушбу ҳудуддан чиқарилиши.

 

Ҳужжат лойиҳасида Харков ва Суми вилоятларининг босиб олинган қисмларидан, шунингдек, Днепропетровскдан Россия қўшинларини олиб чиқиш таклиф қилинган.

 

Херсон ва Запороже вилоятларида Украина қўшинлари ҳозир турган чизиқларда қолиши кўзда тутилган.

 

Россия Запороже АЭСни ўзида қолдиришни истамоқда, Украина эса бунга қарши. АҚШ эса станцияни бошқариш бўйича қўшма форматни таклиф қилмоқда.

 

Киев ва Вашингтон Украинани тиклаш ҳамда хавфсизлик кафолатлари бўйича келишувлар имзолайди. Мамлакат учун Иккинчи жаҳон урушидан кейинги “Маршалл режаси”га ўхшаш ташаббус амалга оширилиши мумкин.