“Зарарли организмлар кириб келиш хавфи мавжуд”
“Яллама” постидан мандаринлар нега киритилмаётганига изоҳ берилди.
Ижтимоий тармоқларда “Яллама” ўсимликлар карантини чегара маскани орқали Хитойдан импорт бўлган маҳсулотларни киритишга карантин хизмати рухсат бермаётгани ҳақида хабарлар тарқалди. Мазкур ҳолат юзасидан Ўсимликлар карантини ва ҳимояси агентлиги расмий муносабат билдирди.
Ўрганиш натижаларида аниқланишича, Хитойдан импорт қилинган мандарин маҳсулоти халқаро нормаларга мувофиқ юкланмаган.
Қайд этилишича, Хитой томонидан бериладиган фитосанитар сертификатларни расмийлаштиришда бир қатор талаблар жорий этилган. Бунда фитосанитар сертификатда таъминотчи боғнинг рўйхатдан ўтган рақамини кўрсатиш, қадоқлаш корхонанинг рўйхатдан ўтган рақамини кўрсатиш ҳамда халқаро ISPM 12 стандартига мувофиқ маҳсулотнинг маркировка рақамини кўрсатиш талаб этилади.
Бироқ “Яллама” ЎКЧМдаги мандарин маҳсулотининг асосий қисми маркировка қилинмаган. Яъни маҳсулотнинг фитосанитар хавфсизлиги таъминламаган бўлиб, хавфсизлиги кафолатланмаган маҳсулот орқали республика ҳудудига карантин остидаги зарарли организмлар кириб келиш хавфи мавжуд.
Фитосанитар сертификатларнинг ҳаққонийлиги Хитойнинг “E-Cert” электрон тизими орқали текширилади. Сабаби Хитойдан импорт қилинган мандарин учун расмийлаштирилган 4985 фитосанитар сертификатдан 2929 таси қалбаки эканлиги маълум бўлган.
Фитосанитар назорат жараёнларининг шаффофлиги ва тезлаштирилишини таъминлаш мақсадида фитосанитар сертификатларнинг ҳаққонийлигини текшириш учун махсус гуруҳ шакллантирилган бўлиб, 24/7 режимида фитосанитар сертификатлар Хитой давлати билан интеграция қилинган тизим орқали текшириб берилади.
“Агентлик мандарин импорти билан шуғулланувчи барча тадбиркорлик субектларини Ўзбекистон Республикаси ҳудудига олиб кириладиган маҳсулотларнинг хавфсиз ва шаффоф тарзда импорт қилиш учун мазкур талабларга қатъий риоя этишга чақиради”, дейилади хабарда.
