АҚШ воситачилигида Таиланд ва Камбоджа ўт очишни тўхтатди
Доналд Трамп томонлар октабрдаги тинчлик келишувига қайтишга тайёр эканини билдирди.
АҚШ президенти Доналд Трамп Таиланд ва Камбоджа бош вазирлари — Анутин Чарнвиракул ва Кҳун Манет билан музокаралар ўтказди. АҚШ етакчисининг маълум қилишича, томонлар 12 декабрь оқшомидан бошлаб сулҳ тузишга келишиб олган.
Трампнинг таъкидлашича, Таиланд ва Камбоджа октабр ойида эришилган тинчлик келишувига қайтишга тайёр. Бу ҳақда у Truth Social ижтимоий тармоғидаги саҳифасида ёзиб қолдирди дейди media.az нашри.
“Икки ажойиб ва гуллаб-яшнаётган мамлакат ўртасида катта урушга айланиши мумкин бўлган муаммони ҳал қилиш учун Анутин ва Хун Манет билан ҳамкорлик қилганимдан фахрланаман”, — деб ёзди АҚШ президенти.
Шунингдек, Доналд Трамп Малайзия Бош вазири Анвар Иброҳимга можарони ҳал этиш жараёнидаги воситачилиги ва кўрсатган ёрдами учун миннатдорлик билдирди.
Эслатиб ўтамиз, Таиланд ва Камбоджа ўртасидаги кескинлик 8 декабрь куни Таиланд армияси баҳсли чегара ҳудудлари бўйлаб ҳаво ҳужумларини бошлаганидан сўнг яна авж олди. Таиланд Қироллик армияси Камбоджа кучларини 7 декабрь куни Сисакет провинциясида Таиланд ҳарбий ходимларига ҳужум қилганликда айблаган.
Бунга жавобан, Камбоджа кучлари кичик қуроллар ва ракета отиш мосламаларидан фойдаланган. Камбоджа Мудофаа вазирлиги эса, ўз навбатида, можаро Таиланд кучларининг ҳужуми билан бошланганини маълум қилган.
