Қозоғистон Марказий Осиё мигрантлари учун эшикларини очишни режалаштирмоқда

 

Қозоғистон Республикаси Мажлиси депутатлари мамлакат иқтисодиётидаги кутилаётган кадрлар танқислиги фонида меҳнат миграцияси масаласини қайта кўриб чиқишни таклиф қилди деб хабар берди Tengrinews. Депутатлар амалдаги меҳнат бозори тартибга солиш механизмлари етарли самара бермаётганини, шунингдек, йирик давлат лойиҳаларини амалга ошириш учун минглаб малакали мутахассисларга эҳтиёж борлигини таъкидламоқда.

 

Ҳужжатда қайд этилишича, мамлакатда сўнгги ўн йил ичида кичик ва ўрта бизнес субъектлари сони 49 фоизга ошган, аммо улар ҳар доим барқарор иш ўринларини яратмайди. Энергетика, уй-жой коммунал хизматлари ва транспорт соҳаларида йирик лойиҳаларни амалга ошириш учун ички кадрлар ресурси етарли бўлмаслиги мумкин.

 

Меҳнат ресурсларини ривожлантириш маркази прогнозларига кўра, 2025-2035 йилларда Қозоғистон иқтисодиётига 3 миллионга яқин ишчи зарур бўлади, шундан 813 минг нафари малакали кадрлар ҳисобланади. Энг катта талаб саноат ва қурилиш соҳаларида кузатилади.

 

Депутатлар кадрлар етишмовчилигини қоплашда меҳнат миграциясини тартибга солишни тавсия қилмоқда. Ҳужжатда қайд этилишича, Қозоғистон Марказий Осиё давлатлари орасида иш ҳақи даражаси юқорилиги сабабли хорижий ишчилар учун жозибадор бўлиб қолмоқда. Шу билан бирга, мавжуд муаммолардан бири — кўплаб мигрантлар ноқонуний ишлаётгани, бу эса маҳаллий даражада коррупцияга сабаб бўлиши мумкинлиги таъкидланган.

 

Депутатлар миграцияни кенгайтириш эмас, балки татбиқ ва назорат механизмлари билан тартибга солиш лозимлигини таъкидлашади. Бунга ишчи квоталари, иш берувчиларнинг жавобгарлиги ва солиқ назорати киритилади. Шунингдек, миграция оқимларини малака, солиқлар ва ижтимоий интеграцияга эътибор қаратган ҳолда стратегик бошқариш тавсия қилинмоқда.