Толибон афғонистонликларнинг хориждаги жангларда қатнашишини тақиқлади

 

Толибон афғонистонликларнинг мамлакат ташқарисидаги ҳарбий можароларда қатнашишини расман тақиқлади. Al Arabia хабарига кўра, ушбу қарор Афғонистон Ислом Амирлиги Бош вазири ва бош судьяси раислигида ўтказилган, қарийб 1000 нафар ислом уламолари иштирок этган йирик конгрессда қабул қилинди.

 

Кобул университетида бўлиб ўтган йиғилишда мамлакат диний идоралари томонидан бир нечта асосий бандлардан иборат диний фармон қабул қилинди. Унга кўра:

• Афғонистон фуқароларининг чет элга чиқиб, ҳарбий операцияларда иштирок этиши қатъиян тақиқланади;
• Толибон ҳукумати бундай уринишларни олдини олиш, шунингдек, қоидабузарларга нисбатан жазо чораларини қўллаш ҳуқуқига эга;
• Афғонистон ҳудудидан бошқа давлатларга қарши ҳарбий мақсадларда фойдаланиш тақиқланади, мазкур талаб мамлакат ҳудудида бўлган хорижий фуқароларга ҳам татбиқ этилади.

 

Ассамблея қарорига мувофиқ, давлат чегараларидан ташқарида ҳарбий ҳаракатларда қатнашаётган ҳар қандай афғонистонлик шахс мамлакатга қарши исёнчи сифатида баҳоланади ва унга нисбатан тегишли санкциялар қўлланади.

 

Декларацияда мазкур тамойилларга риоя этилишини таъминлаш Афғонистон ҳукуматининг бевосита мажбурияти экани алоҳида қайд этилди. Уламолар расмийларни мамлакатнинг минтақавий можароларга аралашувининг олдини олишга ҳамда қонунбузарликларга нисбатан қатъий чоралар кўришга чақирдилар.

 

Tolo news хабарига кўра, конгресс иштирокчилари ўз ҳуқуқлари, қадриятлари ва Ислом тизимини ҳимоя қилиш мажбурий эканини, бироқ бу хориждаги ҳарбий операцияларда иштирок этишни англатмаслигини таъкидлашган.

 

Мазкур қарор Покистон билан муносабатлар кескинлашган бир шароитда қабул қилинди.