Тошкентда “Авиасозлар” бозорида ёнғин содир бўлди
Ҳодиса оқибатида тан жароҳати олганлар йўқ.
13 декабрь куни соат 01:30 да Тошкент шаҳри Яшнобод тумани Бешариқ кўчасида жойлашган «Авиасозлар» бозори ҳудудидаги маъмурий бинода ёнғин содир бўлгани тўғрисида Тошкент шаҳар Фавқулодда вазиятлар бошқармасига хабар келиб тушган.
Мазкур хабарга асосан ёнғин-қутқарув экипажлари соат 01:34 да воқеа жойига етиб борган ва ёнғинни бартараф этиш ишлари олиб борилган.
Ёнғин 02:29 да қуршаб олинган, 03:03 да тўлиқ ўчирилган.
Ҳодиса оқибатида тан жароҳати олган фуқаролар ҳақида маълумот келиб тушмаган.
Айни вақтда вазият Тошкент шаҳар Фавқулодда вазиятлар бошқармаси томонидан тўлиқ назоратга олинган.
