Трамп баёнотига қарамай, Таиланд–Камбоджа чегарасида тўқнашувлар давом этмоқда
Томонлар АҚШ президенти баёнотини ҳозирча расман тасдиқламади.
АҚШ президенти Доналд Трамп Таиланд ва Камбоджа ўртасида сулҳга эришилганини эълон қилганига қарамай, икки давлат ўртасидаги ҳарбий тўқнашувлар тўхтамади. Бу ҳақда Reuters ахборот агентлигига таяниб Report хабар бермоқда.
Маълум қилинишича, Трамп томонлар унинг воситачилигида сулҳ бўйича келишувга эришганини билдирган. Бироқ Таиланд ва Камбоджа расмийлари ушбу баёнотни ҳозирча тасдиқламаган.
Камбоджа Ахборот вазирлиги маълумотларига кўра, Таиланд қуролли кучлари баҳсли чегара ҳудудларида ҳарбий ҳаракатларни, жумладан, қирувчи самолётлар орқали зарбалар беришни давом эттирган. Расмийларга кўра, портлашлар сулҳ эълон қилинганидан кейин ҳам қайд этилган.
Ўз навбатида, Таиланд ҳарбийлари Камбоджани халқаро ҳуқуқ нормаларини бузишда айблаб, тинч аҳоли пунктларига ҳужумлар уюштирилаётганини ҳамда Таиланд назорати остидаги ҳудудларга миналар ўрнатилаётганини маълум қилди.
Вазият минтақада кескинлигича қолмоқда, томонлар ўртасидаги қарама-қарши айбловлар эса давом этмоқда.
