Виткофф Берлинда Европа Иттифоқи етакчилари ва Зеленский билан учрашади
Музокаралар тинчлик битими шартлари бўйича келишмовчиликларни бартараф этишга қаратилган.
АҚШ президенти Доналд Трампнинг махсус вакили Стивен Виткофф Берлин шаҳрида Европа Иттифоқи етакчилари ҳамда Украина президенти Владимир Зеленский билан учрашувлар ўтказиши кутилмоқда. Бу ҳақда The Wall Street Journal нашри манбаларига таяниб Таss хабар берди.
Маълум қилинишича, Виткофф 14–15 декабрь кунлари Буюк Британия, Германия ва Франция вакиллари билан музокараларда иштирок этади. Нашрга кўра, АҚШ маъмуриятининг махсус вакилни Берлинга юбориш ҳақидаги қарори Вашингтон ва Киев ўртасида тинчлик битими шартлари юзасидан юзага келган келишмовчиликларни бартараф этишга бўлган интилишни кўрсатади.
WSJ маълумотларига кўра, музокараларда Франция президенти Эммануэл Макрон, Буюк Британия бош вазири Кейр Стармер ҳамда Германия канцлери Фридрих Мертс ўз маслаҳатчилари билан биргаликда қатнашиши кутилмоқда.
Шунингдек, нашр қайд этишича, дастлаб Европа етакчилари ушбу ҳафта охирида АҚШ президенти Доналд Трамп билан АҚШ томонидан илгари сурилган тинчлик режаси бўйича таклифларни муҳокама қилишни режалаштирган.
Аввалроқ Трамп, агар Вашингтон музокараларни самарали деб ҳисобласа, АҚШ Европадаги учрашувларга ўз вакилини юборишини билдирган эди.
