Ўзбекистонда рецептсиз дори савдоси учун жавобгарлик кучайтирилиши мумкин
Депутат Алишер Қодиров дори воситаларини шифокор тавсиясисиз сотишга қарши қатъий чоралар кўришни таклиф қилди.
Ўзбекистонда рецептсиз дори сотганлик учун жавобгарликни янада кучайтириш бўйича таклиф тайёрланиши режалаштирилмоқда. Бу ҳақда “Миллий тикланиш” демократик партияси раиси, депутат Алишер Қодиров маълум қилди. Унинг таъкидлашича, дори-дармон бозорида даромад ортидан қувиш айрим ҳолларда инсон саломатлигини иккинчи даражага тушириб қўймоқда.
Депутатнинг фикрича, беморни «товар» сифатида кўриш амалиётига барҳам бериш ва дори ичиш масаласини фақат шифокор ҳал қилиши керак. У қандли диабет каби сурункали касалликларда асоссиз равишда қиммат ва самарасиз дорилар тавсия этилаётганини танқид қилиб, бу ҳолат жамият саломатлигига жиддий хавф туғдиришини қайд этди.
Амалдаги қонунчиликка кўра, кучли таъсир қилувчи моддаларни рецептсиз сотганлик учун 2 миллион сўмдан 4 миллион сўмгача жарима белгиланган. Шу билан бирга, 2025 йил 10 декабрдан бошлаб айрим ҳудудларда электрон рецепт тизими жорий этилди. Соғлиқни сақлаш вазирлиги эълон қилган янги рўйхатга кўра, рецептсиз бериладиган дори воситалари сони 400 тадан кам бўлиб, бу аввалги йилларга нисбатан қарийб икки баробар қисқартирилган.
