“Ҳали ҳам статистикани ошкор қилишдан қўрқамиз” — Саида Мирзиёева зўравонликка қарши самарали тизим зарурлигини айтди
Президент администрацияси раҳбари аёллар ва болалар ҳуқуқларини ҳимоя қилиш масалаларига бағишланган йиғилишда кескин фикр билдирди.
Президент администрацияси раҳбари Саида Мирзиёева масъул раҳбарлар билан аёллар ва болалар ҳуқуқларини ҳимоя қилиш, уларга нисбатан зўравонликка қарши курашиш, шунингдек, эрта ҳомиладорлик сабаблари ва уларнинг олдини олиш масалаларини муҳокама қилди. У Марказий Осиёда оилавий зўравонликка қарши қонун қабул қилган биринчи давлат айнан Ўзбекистон эканини, болаларга нисбатан жинсий жиноятлар учун жавобгарлик кучайтирилганини қайд этди.
Шу билан бирга, Саида Мирзиёева бу чоралар етарли эмаслигини таъкидлаб, зўравонлик ҳолатларига тезкор ва самарали жавоб берадиган тизимни ишлаб чиқиш зарурлигини билдирди. Унинг сўзларига кўра, кўплаб ҳолатларда реал вазият яширилади, жамият эса статистикани ошкор қилишдан, танқид ва обрўга путур етишидан қўрқиб келмоқда.
“Зўравонликнинг ҳар қандай кўринишига қарши муросасиз кураш қуруқ гапда эмас, амалда намоён бўлиши керак. Инсон тақдири статистикадан минг карра муҳимроқ”, — деб ёзди Саида Мирзиёева. У барча масъул раҳбарларни муҳокамалардан аниқ хулоса чиқариб, аёллар ва болаларнинг ҳуқуқ ҳамда манфаатларини реал ҳимоя қилишга чақирди.
