Ўзбекистон яна Жаҳон банкидан қарз олди

 

Жаҳон банки 1 миллион ўзбекистонликнинг ҳаётини яхшилаш учун 250 миллион қарз берди. Маблағ шаҳар ва туманлардаги муниципал инфратузилмани яхшилашга йўналтирилади.

 

Ажратилган пуллар “Шаҳарларда яшаш ва унумдорликни ошириш учун қулай шароитлар яратиш” (Livable and Productive Cities Program — LPCP) дастури доирасида мамлакатнинг 16 та туман ва шаҳрида амалга оширилади. Мазкур дастур иқтисодиёт ва молия вазирлиги ҳамда маҳаллий ҳокимиятлар билан келишилган ҳолда амалга оширилади. У аҳоли ва бизнес учун муниципал хизматлардан фойдаланиш имкониятларини кенгайтиришни кўзда тутади.

 

Лойиҳа доирасида ижтимоий ва коммунал инфратузилма, транспорт, савдо ва ишбилармонлик муҳити, туризм объектлари ҳамда жамоат жойларига сармоя киритилади. Хусусан, мактаблар ва боғчалар, тиббиёт муассасалари, сув таъминоти ва канализация тизимлари, йўллар, пиёдалар ҳудудлари, бозорлар, боғлар ҳамда шаҳарларни сув тошқинларидан ҳимоя қилиш иншоотлари янгиланиши режалаштирилган.

 

Жаҳон банки ҳисоб-китобларига кўра, 2030 йилга қадар мазкур дастур орқали 1 миллионга яқин аҳолининг турмуш шароити тўғридан-тўғри яхшиланади. Фойда кўрувчиларнинг тахминан ярмини аёллар ташкил этади. Шунингдек, 300 минг нафар аҳоли учун транспорт хизматларидан фойдаланиш имкониятлари кенгаяди, 400 минг киши эса янги ёки янгиланган жамоат жойлари ва боғлардан фойдаланади.

 

Эслатиб ўтамиз, аввалроқ Жаҳон банки таълим кредитларини молиялаштириш тизимини қўллаб-қувватлаш қаратилган EduImkon доирасида 250 миллион АҚШ доллари миқдорида кредит берган эди. Мазкур дастур доирасида 3 йил ичида 600 минг ёшлар учун таълим кредитларидан фойдаланиш имкониятини кенгайтириш кутилмоқда.