Қорақалпоғистонда ис газидан уч киши вафот этди
Фожиа қўлбола иситиш печининг ноқонуний уланиши оқибатида содир бўлган.
Қорақалпоғистон Республикасининг Хўжайли туманида ис газидан заҳарланиш оқибатида уч киши вафот этди. Бу ҳақда туман ҳокимлиги матбуот хизмати маълум қилди.
Маълум бўлишича, 13 декабрь куни “Саманкўл” ОФЙ Қамисшоли аҳоли пункти Фахрийлар кўчасида жойлашган ижарадаги уйда яшаб келган фуқаро A.Ж. уйини иситиш мақсадида қўлбола иситиш печини ўзбошимчалик билан бошқа хонага кўчирган ҳамда уни мўрисиз ҳолда газ тармоғига ноқонуний равишда улаган.
Мазкур ҳолат оқибатида хонада газ ёнишидан ҳосил бўлган тутун — ис гази тўпланиб, фуқаро A.Ж. ва унинг икки нафар набираси кучли заҳарланган. Натижада 2011 йилда туғилган A.С. (8-синф ўқувчиси) ва 2015 йилда туғилган A.Қ. (4-синф ўқувчиси) ҳамда фуқаро A.Ж. воқеа жойида вафот этган.
Туман ҳокимлиги марҳумларнинг оиласига ижтимоий ёрдам кўрсатилаётганини билдирди. Мазкур ҳолат юзасидан ҳозирда терговга қадар текширув ишлари олиб борилмоқда.
