Путин экстремизмга алоқадор шахсларнинг маблағларини чекловчи қонунни имзолади

 

Россия Федерацияси президенти Владимир Путин экстремистик фаолият ёки терроризмга алоқадор шахсларнинг молиявий операцияларини қатъий назорат қилишни назарда тутувчи янги қонунни имзолади. Ушбу ҳужжат бундай шахсларнинг пул маблағлари ва мол-мулкидан фойдаланиш тартибини сезиларли даражада чеклайди. Бу ҳақда “РИА Новости” хабар берди.

 

Янги қонунга мувофиқ, экстремист ва террорчилар рўйхатига киритилган фуқароларга фақат ўз эҳтиёжлари ҳамда улар билан бирга яшовчи, даромад манбайига эга бўлмаган оила аъзоларини таъминлаш мақсадида молиявий операцияларни амалга оширишга рухсат берилади. Бундай харажатларга иш ҳақи, пенсия, стипендия, нафақа ва бошқа ижтимоий тўловларни олиш ҳамда улардан фойдаланиш киради.

 

Шу билан бирга, оила аъзолари учун сарфланиши мумкин бўлган маблағлар миқдори чекланган. Ҳукумат Россия Марказий банки билан келишилган ҳолда, ҳар бир оила аъзоси учун ойига 10 минг рублдан ошмаган лимит белгилади.

 

Қонунга кўра, бундай молиявий операцияларни амалга оширишдан аввал фуқаролар Росфинмониторинг билан мажбурий тартибда келишувдан ўтиши лозим. Бунинг учун режалаштирилаётган операциялар, улар ўтказиладиган банклар ва ҳисоб рақамлари кўрсатилган ариза тақдим этилиши талаб этилади.

 

Маблағлари музлатилган шахслар гуманитар мақсадларда бериладиган ойлик нафақаларни олиш ва сарфлаш билан бир қаторда, солиқ, жарима ҳамда бошқа мажбурий тўловларни амалга ошириш ҳуқуқига эга бўлади. Бироқ бундай тўловлар фақат Терроризм ва экстремизмни молиялаштиришга қарши кураш бўйича идоралараро комиссияга батафсил маълумотларни ўз ичига олган ариза топширилгандан сўнг рухсат этилади.

 

Агар банк ҳисоб рақамлари орқали операцияларни амалга оширишнинг имконсизлиги асослаб берилса, ваколатли органлар томонидан шахс фойдаланиши мумкин бўлган ҳисоб рақамлари сони чекланиши ёки умуман ҳисоб рақамисиз амалга ошириладиган операциялар тақиқланиши мумкин.

 

Қонунда, шунингдек, экстремизм, қўпорувчилик ёки терроризмга алоқадорликда гумон қилинаётган ҳамда қидирувда бўлган шахсларнинг молиявий операцияларини тўлиқ тўхтатиб қўйиш тартиби белгиланди. Росфинмониторинг расмий веб-сайтида шахс рўйхатга киритилганлиги ҳақидаги маълумот эълон қилинганидан кейин 24 соат ичида унинг мол-мулки музлатилиши шарт.

 

Бундан ташқари, БМТ Хавфсизлик Кенгаши резолюцияларида қайд этилган шахсларга нисбатан пул маблағлари ва бошқа мулкларни музлатиш чоралари олдиндан хабардор қилинмасдан қўлланилиши белгиланди.

 

Мазкур қонун расмий эълон қилинган кундан бошлаб кучга киради.