Тошкент аэропортида ширинликлар орасига яширилган қимматбаҳо заргарлик буюмлари аниқланди
Дубайдан келган фуқаро қарийб 500 млн сўмлик тилла буюмларни божхона назоратидан яширинча олиб ўтмоқчи бўлган.
Тошкент халқаро аэропортида божхона ходимлари томонидан йирик миқдордаги ноқонуний олиб кирилаётган заргарлик буюмлари тўхтатиб қолинди. Дубайдан учиб келган ва "яшил" йўлак орқали ҳаракатланган фуқаронинг шубҳали хатти-ҳаракатлари эътиборни тортди.
Текширув жараёнида фуқаро ўзига тегишли қўл ва йўл сумкалари орасига, шунингдек, ширинликлар қадоқларига тилла заргарлик буюмларини яширгани аниқланди. У буюмларни устамонлик билан ниқоблашга уринган бўлсада, божхона назоратидан четда қола олмади.
Шахсий кўрик ва юкларни кўздан кечириш натижасида умумий оғирлиги 292 грамм бўлган, қиймати 438 миллион сўмга тенг заргарлик буюмлари борлиги маълум бўлди. Ҳозирда мазкур ҳолат юзасидан белгиланган тартибда суриштирув ишлари олиб борилмоқда.
