Трамп BBC’ни судга берди

 

АҚШ президенти Дональд Трамп Британинг BBC телерадиокомпаниясини судга берди. У телеканални 2021 йил 6 январь куни қилган нутқидан парчаларни монтаж қилиб, гўёки у тарафдорларини Капитолийга бостириб киришга ундагандек кўрсатганликда айбламоқда. Бу ҳақда Reuters маълум қилди. 

 

Трампга кўра, эфирда унинг нутқининг турли қисмлари бирлаштирилган. Жумладан, Капитолий томон юришга чақирган сўзлари ва “бор куч билан курашинг” деган ибораси қўшиб берилган. Бироқ норозилик тинч йўл билан ўтказилиши кераклиги ҳақидаги гаплари кесиб ташланган. Натижада, унинг фикрича, томошабинларда воқеа ҳақида бузиб кўрсатилган тасаввур шаклланган.

 

Трампнинг даъвоси Маями шаҳридаги федерал судга топширилган. Унда BBC нафақат туҳматга йўл қўйгани, балки Флорида штатининг ноҳақ ва чалғитувчи амалиётлар тўғрисидаги қонунини ҳам бузгани айтилади. Трамп даъвонинг ҳар бир банди бўйича 5 миллиард доллардан, жами 10 миллиард долларгача товон пули талаб қилмоқда.

 

BBC’нинг Панорама дастурида эфирга узатилган ҳужжатли фильмида Трампнинг 6-январдаги нутқидан бир-биридан анча вақт оралиғида айтилган учта алоҳида лавҳа бирлаштирилган. Трампнинг юристлари бу монтажни “сохта ва туҳматга асосланган” деб атаган. Улар видео Трампнинг қўзғолонни рағбатлантиргани ҳақидаги нотўғри таассуротни шакллантираётганини таъкидлаган.

 

Трамп GB News телеканалига берган интервьюсида BBC’ни ноқонуний ҳаракатларда айблаб, бу таҳрирни сайловларга аралашиш билан таққослаган. Унинг айтишича, асл нутқи ижобий руҳда бўлган, бироқ BBC уни бузиб кўрсатган. Президент бу ҳолатни “сохталикдан ҳам баттар — бу бузуқлик”, деб атаган.

 

Мазкур можаро ортидан ноябрь ойида BBC бош директори Тим Дейви ва BBC News янгиликлар бўлими раҳбари Дебора Тернесс истеъфога чиққан эди. Йўл қўйилган хато учун масъулиятни ўз зиммасига олган.

 

Мутахассислар Трамп даъвони айнан АҚШда киритганини муддатлар билан изоҳламоқда. Чунки Буюк Британияда туҳмат бўйича ишлар фақат материал эълон қилинганидан кейин бир йил ичида қўзғатилиши мумкин, бу муддат эса аллақачон ўтиб кетган.

 

Энди Трамп нафақат монтаж ёлғон эканини, балки BBC томошабинларни атайлаб чалғитганини ёки қўпол бепарволик билан иш тутганини ҳам исботлаши керак бўлади. Акс ҳолда, сўз ва матбуот эркинлигини кафолатловчи конституциявий нормалар сабабли даъво рад этилиши мумкин.