Бухорода Афғонистондан олиб келинган салкам 5 кг наркотик тўхтатиб қолинди

 

“Хавфсиз ва соғлом юрт” тезкор-профилактик тадбирлари доирасида Давлат хавфсизлик хизмати Бухоро вилояти бўйича бошқармаси ходимлари томонидан гиёҳвандлик воситаларининг ноқонуний муомаласига чек қўйилди. Бу ДХХ Zamon.uzga хабар берди.

 

Хусусан, “Бухоро – Қоракўл” йўналишида ҳаракатланаётган “Gentra” русумли автотранспорт воситаси Жондор тумани ҳудудида тўхтатилиб, белгиланган тартибда текширилди.

 

Текширув давомида автомашина салонида Қоракўл туманида яшовчи 1969 йилда туғилган шахс ҳамда 1973 йилда туғилган хорижий давлат фуқаросига тегишли бўлган соф вазни 4 килограмм 715 грамм “опий” гиёҳвандлик моддаси борлиги аниқланди ва у процессуал тартибда расмийлаштириб олинди.

 

Аниқланишича, мазкур гиёҳвандлик моддаси аввалроқ наркокурерлар томонидан Афғонистондан контрабанда йўли билан олиб келинган ва Бухоро шаҳри ҳудудида яширин жойга жойлаштирилган бўлган. Гумонланувчилар ушбу моддани айнан шу жойдан олиб кетаётган вақтида ушланган.

 

Ҳозирда мазкур шахсларга нисбатан Ўзбекистон Республикаси Жиноят кодексининг 28, 246-моддаси 2-қисми (контрабанда) ҳамда 25, 273-моддаси 5-қисми (гиёҳвандлик воситалари, уларнинг аналоглари ёки психотроп моддаларни ўтказиш) билан жиноят иши қўзғатилиб, “қамоқ” эҳтиёт чораси қўлланилди.

 

Амалдаги қонунчиликка мувофиқ, ушбу турдаги жиноятларни содир этган шахслар 10 йилдан 20 йилгача озодликдан маҳрум этилиши мумкин.