Қайси дорилар рецепт билан, қайси дорилар рецептсиз берилади?
My.gov.uz’да дориларни рецепт билан ёки рецептсиз берилиш ҳолатини текшириш хизмати ишга тушди.
Ягона интерактив давлат хизматлари портали — my.gov.uzda дори воситаларини рецепт билан ёки рецептсиз берилиш ҳолатини онлайн текшириш хизмати ишга туширилди. Хизмат бепул ва реал вақт режимида ишлайди.
Эндиликда фойдаланувчилар дори номини киритиш орқали Ўзбекистон ҳудудида рўйхатдан ўтган дори воситаларини кўришлари, уларнинг рецепт билан ёки рецептсиз сотилиши ҳақидаги маълумотни аниқлашлари мумкин. «Батафсил» тугмаси орқали эса дори шакли, ишлаб чиқарувчиси, яроқлилик муддати ва давлат рўйхатидан ўтказилганлик гувоҳномасининг амал қилиш муддати ҳақида тўлиқ маълумот олиш мумкин.
Шунингдек, порталда тайинланган электрон рецептлар тўғрисидаги маълумотлар ҳам мавжуд. Янги хизмат электрон рецептлар бўйича синов лойиҳаси ишга туширилганидан беш кун ўтиб жорий этилди.
Сўнгги кунларда аҳоли дорихоналарда рецепт талаб қилинадиган дори воситалари ва рецептсиз сотиладиган дори фарқлари ҳақида маълумот олиш имконини сўраб мурожаат қилган эди. Шу муносабат билан Соғлиқни сақлаш вазирлиги ва Фармацевтика тармақларини ривожлантириш агентлиги дори воситалари рўйхатини жадваллар кўринишида тақдим қилган эди.
