Брюсселда фермерлар оммавий норозилик намойиши ўтказмоқда
Фермерлар ЕИ–Mercosur савдо келишувига қарши чиқиб, тенг рақобат ва бюрократияни қисқартиришни талаб қилмоқда.
Евроиттифоқ саммити ўтказилаётган Брюссел шаҳрида минглаб фермерлар норозилик намойиши билан чиқди. Оммавий ахборот воситаларига кўра, шаҳарнинг Европа квартали қишлоқ хўжалиги техникалари билан деярли тўсиб қўйилган, марказий кўчаларда юзлаб тракторлар жамланган.
Reuters агентлигининг хабар беришича, намойиш авж олганидан сўнг полиция кўздан ёш оқизувчи газ ва сув пушкаларидан фойдаланган. Айрим намойишчилар полиция томон тош ва картошка улоқтирган, бинолар ойналарига шикаст етган. Ҳуқуқни муҳофаза қилувчи органлар тартибсизлик кучайган пайтда айрим иштирокчиларни ҳибсга олишга уринган.
Маълум қилинишича, полиция дастлаб 50 та трактор иштирокидаги акцияга рухсат берган, бироқ куннинг биринчи ярмига келиб Брюсселга тахминан мингта трактор етиб келган. Намойишчилар сони 7 минг нафар атрофида баҳоланмоқда. Фермерлар Аргентина, Бразилия, Парагвай ва Уругвайни ўз ичига олган Mercosur давлатлари билан тузилиши мумкин бўлган савдо келишуви Европа бозорига арзон маҳсулотлар оқимини кучайтириб, маҳаллий ишлаб чиқарувчиларга зарар етказишидан хавотир билдирмоқда.
