Тошкент, Самарқанд ва Сирдарёда адвокатлар пора билан қўлга тушди

 

Давлат хавфсизлик хизмати ҳамда Прокуратура органлари томонидан Тошкент, Самарқанд ва Гулистон шаҳарларида ўтказилган тезкор тадбирлар давомида уч нафар адвокатнинг ноқонуний фаолиятига чек қўйилди. Бу ҳақда ДХХ Zamon.uzga хабар берди.

 

Хусусан, ДХХ Тошкент шаҳар бўйича бошқармаси томонидан ўтказилган тезкор тадбирда пойтахтда фаолият юритувчи, муқаддам судланган адвокат 5 минг АҚШ доллари миқдорида ноқонуний пул олаётган вақтида ушланди. Аниқланишича, у Миробод тумани ИИО ФМБ Тергов бўлимида Жиноят кодексининг 131 ва 135-моддалари билан қўзғатилган жиноят иши бўйича айбланувчидан суд тизимидаги танишлари орқали 135-моддани олиб ташлаш ва озодликдан маҳрум қилиш билан боғлиқ бўлмаган жазо тайинланишига кўмаклашиш эвазига жами 10 минг АҚШ доллари талаб қилган.

 

Самарқанд шаҳрида қайд этилган ҳолатда эса маҳаллий адвокатлик фирмасининг адвокати Жиноят кодексининг 273-моддаси билан қўзғатилган ва жиноят ишлари бўйича Самарқанд шаҳар судида кўриб чиқилаётган иш бўйича айбланувчига нисбатан суд органларидаги танишлари орқали енгилроқ жазо тайинланишига ёрдам бериш эвазига 4 минг АҚШ долларини олаётган вақтида ушланди.

 

Шу каби қонунбузарлик Сирдарё вилоятида ҳам аниқланиб, Гулистон шаҳрида фаолият юритувчи адвокатлик бюроси адвокати Оқолтин туманидаги МЧЖ раҳбаридан 450 миллион сўмлик дори воситаларини олиб, тўловни амалга оширмаган шахсларга нисбатан ҳуқуқни муҳофаза қилувчи органлар орқали жиноят иши қўзғатишга кўмаклашиш эвазига 1 500 АҚШ доллари олган вақтида қўлга олинди.

 

Ҳозирда мазкур уч нафар адвокатга нисбатан Жиноят кодексининг 168-моддаси 3-қисми «в» банди ҳамда 28, 211-моддаси 1-қисми билан жиноят ишлари қўзғатилиб, тергов ҳаракатлари олиб борилмоқда.