Венесуэла БМТ Хавфсизлик Кенгашининг фавқулодда йиғилишини талаб қилмоқда
Венесуэла АҚШни халқаро ҳуқуқни бузишда айблаб, БМТга мурожаат қилди
Венесуэла ҳукумати АҚШ томонидан амалга оширилаётган ҳаракатлар муносабати билан Бирлашган Миллатлар Ташкилоти Хавфсизлик Кенгашининг фавқулодда йиғилишини чақиришни талаб қилди. Бу ҳақда The Nev York Times нашри хабар берди.
Маълум қилинишича, 17 декабрь куни Венесуэла ташқи ишлар вазири томонидан БМТ Хавфсизлик Кенгашига йўлланган расмий мактубда АҚШ президенти томонидан Венесуэланинг миллий суверенитети очиқдан-очиқ бузилаётгани қайд этилган. Мактубда мамлакатнинг ҳудудий яхлитлиги ва сиёсий мустақиллигига таҳдид мавжудлиги таъкидланган.
Каракас АҚШни халқаро ҳуқуқ нормалари ва БМТ Низомини бузишда айблаб, Вашингтоннинг мазкур ҳаракатлари халқаро муносабатларда беқарорлик ва вайронкорликни кучайтиришини билдирган. Шунингдек, Венесуэла Хавфсизлик Кенгашидан АҚШнинг Венесуэла кемалари ва савдосига қарши чораларини расман қоралашни сўраган.
Нашр маълумотларига кўра, юзага келган вазият фонида Венесуэла ҳукумати нефть маҳсулотларини ташиётган танкерларни ҳарбий денгиз флоти кузатувида олиб бориш бўйича кўрсатма берган. Хабардор манбаларга кўра, 16 декабрь кечаси ва 17 декабрь тонгида бир нечта кемалар ҳарбий эскорт остида йўлга чиққан.
Таъкидланишича, мазкур чоралар АҚШ президенти Доналд Трамп томонидан билдирилган таҳдидларга жавобан жорий этилган. Америкалик расмийлар Каракаснинг ҳарбий эскорт ҳақидаги қароридан хабардор эканини ва вазият бўйича турли вариантлар кўриб чиқилаётганини маълум қилган.
Эслатиб ўтилишича, аввалроқ Доналд Трамп Венесуэлага бораётган ва у ердан чиқаётган санкцияланган нефть танкерларини тўлиқ блокировка қилиш бўйича кўрсатма беришини билдирган ҳамда Венесуэла амалдаги ҳукуматини хорижий террористик ташкилот сифатида эълон қилган эди.
