Андижонда 7,7 кг олтинни ноқонуний олиб чиқмоқчи бўлган шахс қўлга олинди
Олтин қуймаларининг умумий қиймати 12 миллиард 465 миллион 795 минг сўмни ташкил этади.
Давлат хавфсизлик хизмати ҳамда Божхона қўмитаси Шахсий хавфсизлик бошқармаси ходимлари ҳамкорлигида ўтказилган тезкор тадбир давомида Андижон вилоятининг Хўжаобод туманида йирик миқдордаги олтинни ноқонуний олиб чиқишга уриниш ҳолати фош этилди. Бу ҳақда ДХХ Zamon.uzga хабар берди.
Хусусан, «Дўстлик» чегара божхона пости яқинида Фарғона вилоятида яшовчи, 1994 йилда туғилган T.T. тўхтатилиб, унга тегишли хўжалик қопи ҳолислар иштирокида кўздан кечирилди.
Текширув жараёнида қоп ичида бўлган темир қопламали уч дона автомобиль эҳтиёт қисми махсус воситалар ёрдамида бўлакларга ажратилганда, уларнинг ичига жами 7 килограмм 784 грамм олтин бўлаклари яширилгани аниқланди.
Баҳолаш хулосасига кўра, ушбу олтин қуймаларининг умумий қиймати 12 миллиард 465 миллион 795 минг сўмни ташкил этади.
Аниқланишича, мазкур фуқаро Тошкент шаҳридан юборилган олтинларни Қирғиз Республикасида қабул қилиб олувчи шахсга юк автотранспорт воситалари ҳайдовчилари орқали божхона назоратидан яширган ҳолда етказиб беришни режалаштирган.
Ҳозирда ушбу шахсга нисбатан Жиноят кодексининг 25, 182-моддаси 2-қисми «а» банди билан жиноят иши қўзғатилиб, «қамоқ» эҳтиёт чораси қўлланилган.
Тергов ҳаракатлари доирасида мазкур қимматбаҳо металлнинг ҳақиқий эгалари шахсини аниқлаш бўйича зарур чоралар кўрилмоқда.
