Интернет орқали болаларга нисбатан номақбул хатти-ҳаракатлар учун жазолар кучайтирилди

 

Олий Мажлис Сенати болаларни зўравонликдан ҳимоя қилиш тизимини янада такомиллаштиришга қаратилган қонунни қабул қилди. Бу ҳақда парламент юқори палатасининг матбуот хизмати хабар берди.

 

Қонун болалар ҳуқуқлари, эркинликлари ва қонуний манфаатларини ишончли ҳимоя қилиш, уларни жинсий зўравонликдан асраш, шунингдек, жиноят ишларида вояга етмаган шахсларнинг гувоҳ ёки жабрланувчи сифатида иштирок этишини тартибга солувчи аниқ ҳуқуқий механизмларни жорий этишни назарда тутади.

 

Ҳужжатда телекоммуникация тармоқлари ва интернетдан фойдаланган ҳолда болаларга нисбатан номақбул хатти-ҳаракатлар содир этганлик учун жиноий жавобгарлик белгиланди. Мазкур норма интернет муҳитида болаларга қарши содир этилаётган ҳуқуқбузарликларнинг олдини олишга қаратилган.

 

Шу билан бирга, Жиноят-процессуал кодексига киритилган ўзгартишларга кўра, вояга етмаган гувоҳ ёки жабрланувчини сўроқ қилишнинг бир кунлик максимал давомийлиги аниқ белгиланди. Шунингдек, уларнинг ҳуқуқ ва манфаатларини ҳимоя қилиш мақсадида қонуний вакилларининг сўроқ жараёнида иштирок этиш тартиби мустаҳкамланди.

 

Сенаторларнинг таъкидлашича, ушбу қонун жиноятларнинг олдини олиш, содир этилган ҳуқуқбузарликлар учун жазонинг муқаррарлигини таъминлаш ҳамда болаларнинг ҳуқуқлари ва қонуний манфаатларини ҳимоя қилишда муҳим аҳамият касб этади.