Жиззахда келин МИБ орқали сепини қайтариб олди
Тадбир давомида 32 турдаги шахсий мол-мулк қайтарилган.
Жиззах вилоятининг Мирзачўл туманида келиннинг сепи МИБ орқали олиб берилди. Бу ҳақида МИБ ахборот хизмати Zamon.uz'га маълум қилди.
Қайд этилишича, Мажбурий ижро бюросининг Мирзачўл туман бўлимига Фуқаролик ишлари бўйича суднинг ижро ҳужжати келиб тушган. Унга кўра, фуқаро М.М. фойдасига ажрашганидан сўнг, келин бўлиб борган уйидан 32 турдаги шахсий мол-мулкни (келинлик сарполарини) қайтариб бериш белгиланган.
Давлат ижрочиси ушбу ижро ҳужжати асосида ишга киришди. Қарздор билан музокаралар олиб борилиб, зарур ижро ҳаракатлари амалга оширилган. Холислар иштирокида ҳужжатда кўрсатилган барча 32 турдаги мол-мулк хатловдан ўтказилиб, ундирувчи — келинга қайтариб берилган.
“МИБ ходимларининг тезкор ва қонуний ҳаракатлари натижасида фуқаро ўз қонуний мулкини тўлиқ қайтариб олишга муваффақ бўлди”, дейилади хабарда.
