“Сағбон” подстанциясидаги техник ишлар сабаб электр узилишлари кутилмоқда
Олмазор туманида 23 декабргача электр таъминотида узилишлар бўлиши мумкин.
Тошкент шаҳри Олмазор туманида жойлашган “Сағбон” подстанциясида модернизация ишлари олиб борилиши муносабати билан жорий йилнинг 19–23 декабрь кунлари айрим ҳудудларда электр энергияси таъминотида вақтинча узилишлар кузатилиши мумкин.
“Ҳудудий электр тармоқлари” АЖ Матбуот хизмати маълумотига кўра, 110/35/10 кВ кучланишли «Сағбон» подстанциясида модернизация дастури доирасида янги ўрнатилган электр қурилмаларини ишга тушириш, синов-созлаш ишларини хавфсиз олиб бориш ҳамда юкламани барқарор тақсимлаш мақсадида қисқа муддатли узилишлар эҳтимоли мавжуд.
Хусусан, Олмазор туманининг «Аҳил», «Бўстонобод», «Ғалаба», «Гулсарой», “Ислом ота”, «Истиқлол», «Мояриқ», «Олтинсой», «Пахта», «Қичқириқ», «Табассум», «Тепагузар», «Умид», “Янги Тошкент”, «Ёшлик» ҳамда «Элпарвар» маҳалла фуқаролар йиғинларининг айрим ҳудудларида электр таъминотида узилишлар бўлиши мумкин.
Шунингдек, таъмирлаш ишлари белгиланган муддатдан олдин якунланиши эҳтимоли ҳам борлиги қайд этилди.
