Ўзбекистонда экологик ҳуқуқбузарликлар учун маъмурий ва жиноий жазолар кучайтирилди
Дарахтларни йўқ қилиш ва табиий ресурслардан ноқонуний фойдаланиш учун жавобгарлик қатъийлаштирилди.
Олий Мажлис Сенати атроф-муҳит, ўсимлик ва ҳайвонот дунёсини муҳофаза қилишни кучайтиришга ҳамда табиий ресурслардан оқилона фойдаланишни таъминлашга қаратилган Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида”ги Қонун кўриб чиқилди . Бу ҳақда парламент юқори палатаси матбуот хизмати маълум қилди.
Қайд этилишича, амалдаги қонунчиликда айрим экологик ҳуқуқбузарликлар учун белгиланган маъмурий ва жиноий жазолар ушбу хатти-ҳаракатларнинг ижтимоий хавфлилик даражаси ҳамда етказилган зарар миқдорига мутаносиб бўлмагани сабабли, бундай ҳолатлар сони ортиб бормоқда. Шу муносабат билан қонун ҳужжатларига тегишли ўзгартириш ва қўшимчалар киритилди.
Хусусан, “Атроф-муҳитни муҳофаза қилиш тўғрисида”ги қонунга мувофиқ, атроф-муҳитга таъсирнинг I ва II тоифаларига мансуб фаолиятни амалга оширувчи юридик шахслар ифлосланиш манбаларига ўрнатилган автоматик мониторинг станциялари орқали олинадиган маълумотларни Давлат атроф-муҳит мониторинги тизимининг ягона геоахборот маълумотлар базасига реал вақт режимида узатиши шарт этиб белгиланди.
“Чиқиндилар тўғрисида”ги қонунга киритилган ўзгартиришларга кўра, фуқаролар томонидан белгиланган тартибда рухсат этилмаган жойларга ташланган чиқиндиларни олиб ташлаш ёки олиб чиқиш билан боғлиқ харажатларни қоплаш мажбурияти мустаҳкамланди.
Шунингдек, давлат ўрмон фондига кирмайдиган дарахт ва буталарни кўчириб ўтказиш учун рухсатнома бериш тартибини жорий этишни назарда тутувчи “Лицензиялаш, рухсат бериш ва хабардор қилиш тартиб-таомиллари тўғрисида”ги қонунга ҳам тегишли ўзгартиришлар киритилди.
Қонун билан атроф-муҳитни ифлослантириш, ер ва ер ости бойликларидан фойдаланиш қоидаларини бузиш, қишлоқ хўжалиги экинлари, ўрмонлар, дарахтлар ва бошқа ўсимликларга зарар етказиш ёки уларни йўқ қилиш учун жиноий жазо чоралари кучайтирилди.
Бундан ташқари, аҳоли пунктларида суғориш тизимларини кўмиш, кўп қаватли уйлар атрофидаги тупроқ ва яшил қопламали майдонларни рухсатсиз бетонлаш каби ҳуқуқбузарликлар учун маъмурий жавобгарлик белгиланди.
