АҚШ Венесуэла яқинида учинчи нефть танкерини қўлга олди
Оқ уй ҳозирча ушбу ҳолат юзасидан расмий изоҳ беришдан бош тортмоқда.
Reuters агентлигининг америкалик икки расмийга таяниб хабар беришича, АҚШ сўнгги икки ҳафта ичида Венесуэла қирғоқлари яқинида учинчи кемани қўлга олган. Расмийлар айнан қайси кема ушлангани ҳақида ҳозирча аниқ маълумот бермаган.
Аввалроқ, 20 декабрь куни АҚШ Венесуэладан нефть олиб кетаётган Centuries нефть танкерини тўхтатган эди. Associated Press маълумотларига кўра, мазкур кема АҚШ санкциялари остида бўлмаган ва қонуний фаолият юритган. Шунингдек, 10 декабрь куни ҳам Венесуэла нефтини ташиётган Skipper танкерининг ушлангани қайд этилган.
17 декабрь куни АҚШ президенти Доналд Трамп Truth Social ижтимоий тармоғида Венесуэлага бораётган ва у ердан чиқаётган санкция остидаги нефть танкерларига нисбатан “тўлиқ блокада” жорий этилганини эълон қилган. У бу қарорни Венесуэла АҚШдан “нефть, ер ва бошқа активларни ўғрилагани” билан изоҳлаган. Шунингдек, ноябрь ойида Венесуэла ҳаво ҳудуди ёпилгани ҳам маълум қилинган эди.
Bloomberg агентлиги манбаларига кўра, сўнгги ушланган учинчи танкер Bella 1 бўлиб, у Панама байроғи остида сузган ва АҚШ санкциялари рўйхатига киритилган. Кема нефть ортиш учун Венесуэлага йўл олган бўлган. Оқ уй ҳозирча ушбу ҳолат юзасидан расмий изоҳ беришдан бош тортмоқда.
