Қашқадарёда кадастр ходимлари 11 ой ичида 400 гектардан зиёд ер майдонида қонунбузилиши ҳолатларини аниқлади
Ўзбошимчалик билан эгаллаб олиш ҳолати энг кўп Қарши шаҳри ва Қарши туманида қайд этилган.
Ерларни ўзбошимчалик билан эгаллаб олишга оид ҳолатларнинг энг кўпи Қарши шаҳри ва Қарши туманида кузатилган. Бу ҳақда Кадастр агентлиги Қашқадарё вилоят бошқармаси Zamon.uz'га маълум қилди.
Хабарда айтилишича, Қашқадарё вилоятида жорий йилнинг ўтган даври мобайнида ер участкаларини ўзбошимчалик билан эгаллаб олиш ва ушбу ер участкаларида ноқонуний иморат қурилишига оид 2 717 та ҳолатда 401.0 гектар ер майдонида қонунбузарлик ҳолатлари аниқланди.
Кадастр агентлигининг Қашқадарё вилояти бошқармаси туман-шаҳар бўлимлари томонидан ер майдонларини ўзбошимчалик билан эгаллаган шахсларга 2 717 та ёзма кўрсатмалар юборилган.
Вилоятда ер қонунбузилиш ҳолатларини бартараф этиш бўйича ўтказилган профилактик тадбирлар натижасида ер қонунбузилиш ҳолатларининг 1 296 таси 305.28 гектаридаги ҳолатлар фуқаролар томонидан ихтиёрий бартараф этилди.
Фуқаролик ишлари бўйича судларга ер участкаларини ўзбошимчалик билан эгалланган ер майдонида ноқонуний қурилган иморатларни бартараф этиш тўғрисида 1 227 (81.79 гектар) даъво аризалари киритилиб, шундан 781 таси қаноатлантирилган. 445 та даъво аризалари ҳозирги кунда кўриб чиқиш жараёнида.
Шаҳар, туманлар кесимида таҳлил қилинганда, энг кўп ноқонуний эгаллаб олиш ҳолатлари Қарши шаҳрида 421 та ҳолатда 7.20 гектар, Қарши туманида 289 та ҳолатда 64.35 гектар, Китоб туманида 283 та ҳолатда 25,41 гектар, Яккабоғ туманида 236 та ҳолатда 17,51 гектарни ташкил қилади.
Маълумот учун, Қонунчиликка кўра, ерларни ноқонуний эгаллаб олиш маъмурий ва жиноий жавобгарликка сабаб бўлади.
