Янги йил муносабати билан туризм ва маданий объектларда чегирмалар жорий этилади

Янги йил байрами муносабати билан туризм соҳасида фаолият юритаётган тадбиркорлик субъектлари, шунингдек, Маданий мерос агентлиги ҳамда «Вақф» хайрия жамоат фонди тасарруфидаги маданий мерос объектлари томонидан аҳоли ва сайёҳлар учун бир қатор қулайликлар яратиш мақсадида чегирмалар жорий этилмоқда.

 

Хусусан, байрам кунлари давомида маданий мерос объектларига ташриф буюрувчилар учун кириш чипталарига 10 фоизгача чегирмалар тақдим этилиши, айрим объектларга эса бепул кириш йўлга қўйилиши режалаштирилган. Ушбу чора-тадбирлар аҳолининг миллий тарихий ва маданий меросга бўлган қизиқишини янада оширишга хизмат қилади.

 

Шу билан бирга, туризм соҳасидаги тадбиркорлик субъектлари томонидан меҳмонхоналар, меҳмон уйлари ва бошқа жойлаштириш воситаларида ихтиёрий равишда 20 фоизгача бўлган махсус байрам чегирмалари жорий этилмоқда. Мазкур чегирмалар маҳаллий ва хорижий сайёҳлар учун қулай шароит яратиб, Янги йил байрамини мамлакатимизнинг турли ҳудудларида мароқли ўтказиш имконини беради.

 

Бундан ташқари, Ўзбекистон Республикаси Президентининг 2024 йил 22 ноябрдаги ПҚ–399-сон қарорига мувофиқ, “Темир дафтар”, “Аёллар дафтари” ва “Ёшлар дафтари”га киритилган фуқаролар ҳамда ногиронлиги бўлган шахслар давлат театрларида намойиш этиладиган спектаклларга бепул киритилиши белгиланган.

 

Шунингдек, 2026 йилни муносиб кутиб олиш мақсадида Тошкент шаҳрида ўтказиладиган 2025–2026 йил Янги йил байрам тадбирлари бўйича маълумотлар (тадбир ўтказиладиган жойлар, вақти ва масъул шахслар) шакллантирилган бўлиб, улар белгиланган ҳавола орқали тақдим этилган.