АҚШни ихтиёрий равишда тарк этган мигрантлар учун пул мукофоти 3000 долларга оширилади

 

АҚШ президент маъмурияти мамлакат ҳудудида ноқонуний яшаётган муҳожирларнинг ўз ихтиёри билан АҚШни тарк этишини рағбатлантириш мақсадида тўланадиган мукофот миқдорини вақтинча оширишга қарор қилди.

 

АҚШ Ички хавфсизлик вазири Кристи Ноэмнинг ижтимоий тармоқларда маълум қилишича, ўзини ўзи депортация қилиш учун ариза топшириб, мамлакатни ихтиёрий равишда тарк этган ноқонуний муҳожирларга 3000 АҚШ доллари миқдорида маблағ тўланади.

 

Вазирнинг таъкидлашича, мазкур миқдор 2025 йил охиригача ўзини депортация қилиш бўйича мурожаат қилган шахсларга нисбатан амал қилади. Кристи Ноэм ушбу чора Рождество ва Янги йил мавсумида америкалик солиқ тўловчилар ҳисобидан ҳужжатсиз муҳожирларнинг мамлакатни ихтиёрий тарк этишини рағбатлантириш мақсадида жорий этилганини қайд этди.

 

Унинг сўзларига кўра, мазкур рағбатлантириш механизми аввалги кўрсаткичларга нисбатан уч бараварга оширилган.

 

Аввалроқ, ноябрь ойида АҚШ Ички хавфсизлик департаменти ноқонуний муҳожирларни мамлакат ҳудудини ихтиёрий равишда тарк этишга чақирувчи расмий мурожаат эълон қилган эди.

 

Шунингдек, сентябрь ойининг охирларида Чикаго шаҳрига АҚШ божхона ва чегара ҳимояси ходимлари юборилгани ҳамда шаҳарда ноқонуний муҳожирларни ҳибсга олиш ишлари бошланганлиги ҳақида хабарлар тарқалган эди. Иллинойс штати губернатори Жей Притскер ҳуқуқни муҳофаза қилиш органларининг ушбу ҳаракатларини танқид қилиб, улар жамиятда қўрқув уйғотаётгани ва бизнес муҳитига салбий таъсир кўрсатаётганини билдирган.

 

Бундан олдин АҚШ Иммиграция хизмати Конгресс аъзосига бомба қўйиш билан таҳдид қилган ноқонуний иммигрантни ҳибсга олгани маълум қилинган эди.