Номусга тегиш жиноятлари 6 фоизга ошди — ИИВ
2025 йилда Ўзбекистонда жиноятлар сони камайган, аммо номусга тегиш билан боғлиқ ҳолатлар ошган.
Ўзбекистон Республикаси Ички ишлар вазирлиги маълумотларига кўра, 2025 йилда мамлакат бўйлаб қайд этилган жиноятлар сони ўтган йилга нисбатан сезиларли даражада камайган. Бу ҳақда ИИВ масъуллари иштирокида ўтказилаётган матбуот анжуманида Ички ишлар вазири ўринбосари, тергов департаменти бошлиғи Рамазон Ашропов маълум қилди дея хабар қилмоқда Zamon.uz мухбири.
Таъкидланишича, 2024 йилда фуқаролар томонидан 60 та қотиллик жинояти содир этилган бўлса, 2025 йилда мазкур кўрсаткич 31 тага тушган. Шунингдек, йўл-транспорт ҳодисалари сони ҳам қисқарган: ўтган йили 9365 та ЙТҲ қайд этилган бўлса, жорий йилда бу рақам 8738 тани ташкил этган.
Бироқ, умумий ижобий кўрсаткичларга қарамай, айрим тоифадаги жиноятлар сони ошгани ҳам қайд этилди. Хусусан, номусга тегиш билан боғлиқ жиноятлар 2024 йилда 359 та бўлган бўлса, 2025 йилда 381 тага етган. Бу эса ўтган йилга нисбатан тахминан 6 фоизлик ўсишни ташкил этади.
