Ўзбекистон божхоналарида 11 ойда 1,6 тонна гиёҳванд модда мусодара қилинди

 

 

Ўзбекистон божхона органлари 2025 йилнинг 11 ойи якунлари бўйича гиёҳвандлик ва психотроп моддалар контрабандасига қарши кураш натижаларини эълон қилди. Расмий маълумотларга кўра, ушбу даврда жами 1,6 тонна ноқонуний наркотик моддалар аниқланиб, муомаладан чиқарилган. Бу ҳақда Тошкент вилояти божхона бошқармаси хабар берди.

 

Статистикага назар ташланса, сўнгги йилларда кўрсаткичлар кескин ошганини кўриш мумкин. Хусусан, 2021 йилда 537 килограмм гиёҳванд модда аниқланган бўлса, 2024 йилда бу рақам 1 тоннага етган. 2025 йилнинг 11 ойи эса рекорд натижа билан якунланиб, асосан табиий наркотик воситалар — 1 191 килограмм гашиш, 259 килограмм опий ва 61 килограмм каннабис мусодара қилинган.

 

Шунингдек, кучли таъсир қилувчи психоактив моддалар ҳажми ҳам сезиларли даражада ошган. Ҳисобот даврида 1,06 тоннадан ортиқ шундай моддалар аниқланган бўлиб, улар орасида сибутрамин (879 кг), прегабалин (119 кг) ва габапентин (28 кг) асосий улушни ташкил этган.

 

Мутасадди идораларга кўра, асосий наркотрафик йўналишлари Афғонистон – Ўзбекистон – Қозоғистон – Россия ҳамда Қирғизистон орқали ўтувчи транзит йўллар бўлиб қолмоқда. 2024–2025 йилларда божхона органлари томонидан 9 та яширин нарколаборатория фош этилган, шунингдек, интернет орқали фаолият юритган наркодўконлардан қарийб 100 килограмм гиёҳванд ва психоактив моддаларнинг ноқонуний савдосига барҳам берилган.