Трамп Қозоғистон президентига Оқ уйнинг “калитини” юборди
Шунингдек, АҚШ президенти Тоқаевга ўз дастхати туширилган бейсбол кепкасини совға қилди.
АҚШ президенти Доналд Трамп Қозоғистон Республикаси президенти Қосим-Жомарт Тоқаевга Оқ уйнинг рамзий калити ҳамда ўз дастхати туширилган бейсбол кепкасини совға қилди. Бу ҳақда Қозоғистон президенти матбуот котиби Руслан Желдибай Тelegram каналида маълум қилди.
Қайд этилишича, совғалар АҚШ президенти томонидан Қозоғистоннинг АҚШдаги элчиси билан учрашув чоғида, ишонч ёрлиқлари топширилганидан сўнг тақдим этилган. Ушбу ташаббус икки давлат раҳбарларининг ноябрь ойида бўлиб ўтган учрашуви якунлари билан боғлиқ.
Доналд Трамп Қосим-Жомарт Тоқаевга ўзининг илиқ тилакларини билдирар экан, уни халқаро жараёнларни чуқур ва мувозанатли тушунадиган, тажрибали давлат арбоби ҳамда юксак инсоний фазилатларга эга етакчи сифатида таърифлади.
Маълумки, Қозоғистон президенти ноябрь ойи бошида АҚШга ишчи ташриф билан борган. Сафар доирасида Доналд Трамп билан музокаралар ўтказилган ҳамда «С5+1» форматидаги саммитда иштирок этилган. Ушбу саммитда Қозоғистон, Ўзбекистон, Қирғизистон, Тожикистон, Туркманистон ва АҚШ вакиллари қатнашган.
Ташриф давомида Қосим-Жомарт Тоқаев АҚШ президентини юксак сиёсий тажрибага эга етакчи сифатида эътироф этган.
