Йил бошидан буён Ўзбекистонда тез тиббий ёрдам хизмати 7 миллиондан ортиқ мурожаатга хизмат кўрсатди

 

Ўзбекистон Республикаси тез тиббий ёрдам хизмати 2025 йил бошидан буён 7 миллиондан ортиқ мурожаатга хизмат кўрсатди. Шу билан бирга, беморларга етиб бориш вақти ўртача уч бараварга қисқартирилди.

 

Бу ҳақда Соғлиқни сақлаш вазири Асилбек Худояров Олий Мажлис Қонунчилик палатасининг навбатдаги йиғилишида маълум қилди. Унинг таъкидлашича, тез тиббий ёрдам тизими самарадорлигини ошириш мақсадида жорий йилда 1000 та замонавий махсус транспорт воситаси харид қилинди. Шунингдек, йирик шаҳарларда биринчи марта ихчам электр транспорт воситаларидан фойдаланувчи мобил фавқулодда ёрдам гуруҳлари фаолияти йўлга қўйилди.

 

Мамлакат бўйлаб тез тиббий ёрдам бригадалари сони 1648 тадан 2865 тагача етказилди. Бу эса юқори юклама ва чақирувлар сони кескин ошган даврларда хизмат кўрсатиш жараёнини янада самарали ташкил этиш имконини берди.

 

Вазир, шунингдек, касалликларнинг олдини олиш борасида эришилган натижаларга тўхталди. Ўтган йилда 19 миллион нафардан ортиқ фуқаро профилактик тиббий кўрикдан ўтказилди. Натижада қандли диабет ҳамда юрак-қон томир касалликлари каби сурункали хасталикларни эрта босқичда аниқлаш имконияти кенгайди ва уларнинг оғир ҳолатларгача етиб боришининг олди олинди.

 

Бундан ташқари, соғлиқни сақлаш тизимида бюрократик жараёнлар сезиларли даражада соддалаштирилди. Эндиликда ногиронликни баҳолаш бўйича ҳужжатлар фақат оилавий шифокорлар томонидан электрон шаклда тақдим этилмоқда. Ушбу ислоҳотлар ва тиббиёт муассасаларини бошқаришнинг янги модели ҳозирда республиканинг 15 та туман ва шаҳрида жорий этилган бўлиб, давлат томонидан бошқариладиган тиббий суғурта тизимига босқичма-босқич ўтиш жараёнини енгиллаштирмоқда.