Пойтахтда пулли автотураргоҳлар учун йиллик рухсатномалар жорий этилади
Резидентлар учун тунги соатларда бепул тўхташ имконияти яратилади.
Тошкент шаҳрида пулли тўхтаб туриш жойларидан фойдаланиш тартиби ўзгаради. Янги қарорга кўра, пойтахтда резидентлар учун махсус йиллик автотураргоҳ рухсатномалари жорий қилинади. Ҳар бир турар жой манзили бўйича кўпи билан икки дона резидент рухсатномасини рўйхатдан ўтказиш мумкин бўлади.
Қарорга асосан, резидентлар учун соат 20:00 дан 08:00 гача автотураргоҳларда тўхташ бепул этиб белгиланди. Кундузги вақтда эса амалдаги тарифлар асосида тўлов ундирилади. Рухсатнома бир йил муддатга берилади ва ундан фойдаланиш фақат белгиланган ҳудудларда амал қилади.
Йиллик резидентлик рухсатномаси учун бир базавий ҳисоблаш миқдори — ҳозирда 412 минг сўм — тўланади. Мазкур тартиб 2026 йил 1 февралдан бошлаб кучга киради.
