Ўзбекистонда махсус таълим эҳтиёжлари бўлган болалар учун инклюзив таълим тизими жорий этилади
Инклюзив таълим болаларнинг жамиятга мослашуви ва ривожланишини қўллаб-қувватлайди.
Ўзбекистонда махсус таълим эҳтиёжлари бўлган болалар учун инклюзив таълим тизимини кенг жорий этиш чоралари белгиланди. Адлия вазирлиги маълумотига кўра, ҳукумат томонидан ушбу тоифадаги болаларнинг сифатли таълим олишини таъминлаш, уларни жамиятга интеграция қилиш ҳамда индивидуал ривожланишини қўллаб-қувватлашга қаратилган қарор тасдиқланди.
Ҳужжатга мувофиқ, Тошкент шаҳрида Ижтимоий ҳимоя миллий агентлиги таркибида Кўп функцияли инклюзив ресурс маркази ташкил этилади. Қорақалпоғистон Республикаси ва вилоятларда эса махсус таълим эҳтиёжлари бўлган болалар учун ихтисослаштирилган мактаблар ёки интернат мактаблари негизида биттадан Кўп функцияли инклюзив ресурс мактаби ташкил этилади.
2026/2027 ўқув йилидан бошлаб ушбу инклюзив марказлар таркибида экспериментал асосда инклюзив-тузатиш мактаблари фаолияти йўлга қўйилади. Ушбу мактабларда бошланғич синф ўқувчиларини мослаштириш, ўрганиш ва мулоқот кўникмаларини ривожлантириш, шунингдек индивидуал ўқув режалари асосида тузатиш ва қўшимча машғулотлар ташкил этилади.
Оддий мактаблардаги инклюзив синфларда таҳсил олаётган ногиронлиги бўлган ўқувчилар учун инклюзив марказлар асосий дарслардан ташқари фанлар, касбий йўналишлар ҳамда тузатиш ишлари бўйича қўшимча машғулотлар ўтказади.
Шунингдек, 2027 йил 1 январдан бошлаб инклюзив марказлар негизида давлат таълим муассасаларида фаолият юритаётган махсус ўқитувчиларнинг билим ва кўникмаларини баҳолаш мақсадида профессионал сертификатлаш тизими жорий этилади.
2027/2028 ўқув йилидан бошлаб ҳудудларда инклюзив мактаблар фаолияти босқичма-босқич йўлга қўйилиши режалаштирилган.
