Россиянинг Украинага зарбалари оқибатида камида 1 киши ҳалок бўлди, 19 киши жароҳатланди
Киев шаҳар ҳарбий маъмурияти раҳбари ҳужумлар пойтахтнинг етти туманидаги объектларга зарар етказганини билдирган.
Россия кучларининг шанба тонгида амалга оширган ракета ва дрон ҳужумлари Украина пойтахти Киев ҳамда унга туташ ҳудудларда талафотларга сабаб бўлди. Маҳаллий ҳокимият маълумотига кўра, камида бир киши ҳалок бўлган, яна 23 нафар фуқаро турли даражада тан жароҳати олган.
Киев мери Виталий Кличко ҳужумлар оқибатида шаҳарнинг ўзида 22 киши жароҳатлангани, уларнинг 12 нафари шифохонага ётқизилганини маълум қилди. Шунингдек, зарбалар сабаб 2 600 дан ортиқ турар жой бинолари, 187 та болалар боғчаси ва 138 та мактаб иссиқлик таъминотисиз қолган.
Киев шаҳар ҳарбий маъмурияти раҳбари Тимур Ткаченко ҳужумлар пойтахтнинг етти туманидаги объектларга зарар етказганини, камида бешта кўп қаватли уй шикастланганини билдирди. Электр таъминотида юзага келган узилишлар сабаб хусусий энергетика компанияси DTEK фавқулодда электр ўчириш чораларини жорий этди.
Киев вилоятида ҳам вазият кескин бўлиб, вилоят раҳбари Мйкола Калашник маълум қилишича, ҳужумлар натижасида бир киши ҳалок бўлган, яна бир фуқаро жароҳатланган. Зарбалар муҳим инфратузилма объектлари, савдо нуқталари ва турар жой биноларини нишонга олган.
