Таиланд ва Камбоджа вақтинчалик сулҳга келишди
Дастлабки сулҳ муддати 72 соат этиб белгиланган.
Таиланд ва Камбоджа расмийлари 27 декабрдан кучга кирадиган вақтинчалик сулҳга келишиб олдилар. Бу ҳақда Тҳаи ПБС ахборот манбаси хабар берди.
Таиланд ҳукуматига яқин манбанинг маълумотига кўра, дастлабки сулҳ муддати 72 соатни ташкил этади. Мазкур келишув икки томон ўртасидаги ҳарбий ҳаракатларни вақтинча тўхтатишни назарда тутади.
Хабарда қайд этилишича, сулҳ режимини узайтириш бўйича кейинги ҳар қандай қарор Таиланд Миллий хавфсизлик кенгаши томонидан тасдиқланиши лозим бўлади.
Эслатиб ўтамиз, Таиланд ва Камбоджа ўртасидаги тўқнашувлар 8 декабрь куни яна авж олган эди. Кейинчалик АҚШ президенти Доналд Трамп томонлар ҳарбий ҳаракатларни тўхтатиш ҳамда октябрь ойида имзоланган тинчлик шартномасига риоя этишга қайтиш бўйича келишувга эришганини маълум қилган.
