Украинадаги урушни ҳал қилиш учун яхши имкониятлар мавжуд – Трамп
АҚШ президенти Москва ва Киев урушни якунлашга қизиқиш билдираётганини қайд этди.
АҚШ президенти Доналд Трамп Украинадаги можарони ҳал қилиш учун яхши имкониятлар мавжудлигини билдирди. Бу ҳақда ТАСС хабар бермоқда.
Трампнинг сўзларига кўра, Москва ва Киев урушни тугатишдан манфаатдор. “Менимча, бизда буни амалга ошириш учун яхши имконият бор. Мен аввал саккизта урушни ҳал қилганман, бу энг қийини эди, аммо менимча, биз бунга дош бера оламиз”, – деди у New York Post нашрига берган интервьюсида.
АҚШ президенти оптимизм билан 28 декабрь куни Украина президенти Владимир Зеленский билан Флорида штатидаги Мар-а-Лаго қароргоҳида бўлиб ўтадиган учрашувда ушбу масала бўйича келишувга эришиш имкониятини таъкидлади.
Трамп шунингдек, ҳар сафар бир томон буни қилиш истагини билдирса, бошқа томон бунга рози бўлмаслигини танқид қилди. Шу билан бирга, у Москва ва Киевнинг ҳозирги вазиятни ҳал қилишга қизиқиш билдираётганини қайд этди.
