Фуқаролар уйи олдига автомобиль қўйгани учун пул тўламайди — Тошкент шаҳар ҳокимлиги

 

 

Ижтимоий тармоқларда Тошкент шаҳар ҳокимининг 2025 йил 25 декабрдаги 921-14-0-Қ/25-сонли қарори юзасидан турли муҳокамалар пайдо бўлди. Айрим фойдаланувчилар ушбу ҳужжатни нотўғри талқин қилиб, эндиликда аҳоли ўз уйи олдида автомобиль қўйгани учун ҳақ тўлашга мажбур бўлади, деган фикрларни илгари сурмоқда.

 

Тошкент шаҳар ҳокимлиги мазкур даъволар асоссиз эканини маълум қилди. Расмий изоҳга кўра, янги жорий этилаётган тартиб фақат йўл бўйида ташкил этилган пулли автотураргоҳлар фаолиятига тааллуқли. Кўп қаватли уйлар оралиғи, ҳовлилар ҳамда тўхтаб туриш тақиқланмаган бепул ҳудудларда автомобиль сақлаш учун ҳеч қандай тўлов ёки махсус рухсатнома талаб этилмайди.

 

Қарорга мувофиқ, пулли автотураргоҳ жойлашган кўчалар ёки уларга яқин ҳудудларда яшовчи фуқаролар учун “резидентлик рухсатномаси” жорий этилади. Ушбу механизм уйи олдида пулли тўхташ жойи ташкил этилган аҳолига имтиёз бериш ва уларнинг автомобиль қўйиш билан боғлиқ муаммоларини камайтиришга қаратилган.

 

Резидентлар соат 20:00 дан 08:00 гача бўлган вақтда пулли автотураргоҳлардан бепул фойдаланиши мумкин бўлади. Кундузги вақтда эса соатбай эмас, балки йилига бир марта тўланадиган қатъий тўлов белгиланади. Йиллик тўлов миқдори базавий ҳисоблаш миқдорининг бир бараварига тенг бўлиб, бир хонадон манзилига кўпи билан икки дона резидентлик рухсатномаси берилади. Ушбу янги тартиб 2026 йил 1 февралдан кучга киради.