TikTok’да жонли эфирда президентни ҳақорат қилган фуқарога 4 йил қамоқ жазоси берилди
Президент Давлат хавфсизлик хизмати ходимлари томонидан амалга оширилган тезкор тадбирлар натижасида ушбу фуқаро Озарбайжонда қўлга олинди.
Қашқадарё вилоятининг Китоб туманида туғилган ва ҳозирда Навоий шаҳрида яшаётган А.Ю. 2023 йилнинг февраль ойида Қозоғистоннинг Олмаота шаҳрида бўлган пайтида TikTok платформасида жонли эфирга чиқиб, давлат раҳбарининг шаъни ва қадр-қимматини ҳақорат қилган. Ушбу чиқиш блогерлар ёрдамида бутун дунё ижтимоий тармоқларида тарқалиб, жамиятда катта резонанс уйғотган.
Чет элга чиқиб кетгандан сўнг, А.Ю. Туркия ва Озарбайжонда бир муддат яшаб, қилган ишларини унутилишига умид қилган. Бироқ қонун устувор бўлиб, Президент Давлат хавфсизлик хизмати томонидан ўтказилган тезкор тадбирлар натижасида А.Ю. 2025 йил апрель ойида Озарбайжонда қўлга олинди.
Суд жараёнида у қилган ишидан пушаймон эканини билдириб, узр сўради: "Мен 2023 йил февраль ойида “Sherxon” номли TikTok профилимда юртбошимизни ҳақорат қилганман. Қилган ишимдан пушаймонман ва бундай сўзларни қайта ишлатмайман", — деди А.Ю.
Суд ҳукмига кўра, А.Ю. Ўзбекистон Республикаси Жиноят кодексининг 158-моддаси учинчи қисми билан айбли деб топилиб, 4 йил муддатга озодликдан маҳрум этилди. Шунингдек, у Ўзбекистонда яшаган пайтида содир этган ўғрилик ва безорилик каби жиноятлари учун ахлоқий тузатиш билан жазоланган.
