Биз Ғарб ва Исроил билан уруш ҳолатидамиз — Эрон президенти
Масуд Пезешкиан Эронга нисбатан босим ва санкциялар кучайганини таъкидлади.
Эрон президенти Масуд Пезешкиан Эрон ҳозирда Ғарб давлатлари, жумладан АҚШ, Исроил ва Европа билан уруш ҳолатида эканини маълум қилди. Бу ҳақда у шанба куни Эрон олий раҳбари оятуллоҳ Али Хоманаий расмий веб-сайтига берган интервьюсида баёнот берди.
Президентнинг таъкидлашича, мазкур давлатлар Эроннинг иқтисодий, сиёсий ва ижтимоий барқарорлашувига тўсқинлик қилишни мақсад қилган. “Биз Америка, Исроил ва Европа билан тўлақонли қарама-қаршиликдамиз. Улар мамлакатимизнинг оёққа туришини истамаяпти”, — деди Пезешкиан.
Мазкур баёнот Исроил бош вазири Бенямин Нетаняхунинг яқин кунларда АҚШ президенти Доналд Трамп билан Эрон масаласи юзасидан музокаралар ўтказиш учун Қўшма Штатларга ташриф буюриши фонида янгради.
Эслатиб ўтилишича, Трамп жорий йил июнь ойида Эроннинг учта ядровий объектига зарба бериш тўғрисида буйруқ берган. Ушбу ҳарбий ҳаракатлар Эрон ва Исроил ўртасида қарийб икки ҳафта давом этган қуролли можаронинг кескинлашувига сабаб бўлган. Кейинчалик ушбу тўқнашув “12 кунлик уруш” номи билан аталиб, июнь ойи охирида сулҳ тузилиши билан якунланган.
Пезешкианнинг айтишича, Доналд Трамп январь ойида Оқ уйга қайтганидан сўнг Эронка нисбатан санкцияларни кучайтириш сиёсати қайта фаоллашган ва бу можаро ҳануз якунига етмаганини кўрсатади.
“Биз ҳар томонлама босим остидамиз. Савдо алоқалари чекланмоқда, иқтисодий алмашинувлар тўсилмоқда, бир вақтнинг ўзида эса жамият ичидаги талаблар ортиб бормоқда. Бу ҳолат турмуш тарзи, маданият, сиёсат ва хавфсизлик соҳаларида муаммоларни юзага келтирмоқда”, — деди Эрон президенти.
Унинг таъкидлашича, мавжуд вазиятда мамлакатни барқарорлаштириш учун барча кучларни сафарбар этиш зарур.
Мазкур баёнотларга нисбатан Оқ уй ва Исроил элчихонаси ҳозирча расмий изоҳ бермаган.
