Фарғонада қарз ундириб бериш эвазига 4 минг доллар талаб қилган суд бошқарувчиси ёрдамчиси қўлга олинди
У минерал ўғитлар ишлаб чиқаришга ихтисослашган МЧЖнинг мазкур кооперативдаги қарзидан 300 млн сўмни ундириб беришни ваъда қилган.
Фарғона вилояти Бешариқ туманида суд тизимига алоқадор мансабдор шахснинг қонунга зид ҳаракати аниқланди. Фаолияти тўхтатилган минерал ўғитлар улгуржи савдоси билан шуғулланувчи ишлаб чиқариш кооперативига бириктирилган суд бошқарувчиси ёрдамчиси пора талаб қилгани маълум бўлди.
Маълумотларга кўра, у минерал ўғитлар ишлаб чиқаришга ихтисослашган МЧЖнинг мазкур кооперативдаги 1 млрд 502 млн сўм миқдоридаги қарзидан 300 млн сўмини ундириб беришни ваъда қилиб, бунинг эвазига 4 минг АҚШ доллари талаб қилган.
Давлат хавфсизлик хизмати ҳамда Иқтисодий жиноятларга қарши курашиш департаменти ходимлари томонидан ўтказилган тезкор тадбир давомида гумонланувчи 48 млн сўм пул маблағини олган пайтда ашёвий далиллар билан қўлга олинди.
Айни пайтда унга нисбатан Жиноят кодексининг 168-моддаси 3-қисми «в» банди асосида жиноят иши қўзғатилиб, тергов ҳаракатлари олиб борилмоқда. Ҳуқуқни муҳофаза қилувчи органлар ҳолат юзасидан қонун доирасида чора кўрилишини маълум қилди.
