Фермерни ҳақоратлаган Боёвут туман ҳокими лавозимидан кетди
Унинг ўрнига Ниёз Хазратқулов туман ҳокими бўлди.
Уралова Дилфуза Джумановна бошқа ишга ўтиши муносабати билан Боёвут тумани ҳокими вазифасидан озод этилди. Бу ҳақида Сирдарё вилояти ҳокимлиги матбуот хизмати хабар бермоқда.
Қайд этилишича, бугун, 29 декабрь куни Боёвут туманида Халқ депутатлари туман Кенгашининг навбатдан ташқари сессияси бўлиб ўтган ва унда ташкилий масала кўрилган.
Депутатлар томонидан Хазратқулов Ниёз Намазбоевич Боёвут тумани ҳокими лавозимига тасдиқланган. Ниёз Хазратқулов 1983 йилда Сирдарё туманида таваллуд топган. Ушбу тайинловга қадар Ширин шаҳар ҳокими лавозимида фаолият олиб борган.
Эслатиб ўтамиз, 2024 йилда ижтимоий тармоқларда Дилфуза Ўролованинг фермерлардан бирини кескин ҳақоратлаб, қўл-оёғини боғлатиб, ички ишлар ходимларига топшириб юборгани эшитилган аудиохабар тарқалганди.
Вилоят ҳокимлиги Одоб-ахлоқ комиссияси томонидан ушбу хатти-ҳаракатлар давлат хизматчиси этикаси ва одоб-ахлоқ қоидаларини бузиш, деб баҳоланган ва ўз навбатида, туман ҳокими ҳолат бўйича тушунтириш бериб, юзага келган вазиятдан пушаймонлигини айтган.
