Нетаньяху Трампни Ғазода янги ҳарбий операция бошлашга кўндирмоқчи
Томонлар тегишли масалани 29 декабрь куни бўлиб ўтадиган йиғилишда муҳокама қилишлари мумкин.
Исроил Бош вазири Бенямин Нетаньяху АҚШ президенти Доналд Трамп билан учрашиш учун АҚШга келди деб хабар берди The Jerusalem Post нашри. Учрашув 29 декабрь куни кечқурун Трампнинг Мар-а-Лаго қароргоҳида бўлиб ўтади. Бу Америка президенти иккинчи муддати давомида Нетаньяху билан ўтказилаётган олтинчи учрашув ҳисобланади.
Томонлар учрашув давомида Ғазо секторидаги режа, Эроннинг баллистик ракета дастури, Ливандаги вазият ва АҚШнинг Исроилга ҳарбий ёрдам кўрсатиш масалаларини муҳокама қилишни режалаштирмоқда.
Манбаларга кўра, Нетаньяху Трампдан Ғазода янги ҳарбий операцияни бошлаш бўйича розилик олишни сўраши мумкин. Бош вазир бу чорани АҚШ президентининг сулҳ режаси доирасидаги кейинги тараққиётга розилигини шарт қилиб амалга оширмоқчи.
