Ўзбекистон бўйлаб сохта дорилар сотган шахслар қўлга олинди
Фирибгарлар Instagram, Facebook, Telegram ва YouTube орқали маҳсулотларини тарқатган.
Ўзбекистон ҳудудида сохта ва сифат кафолати бўлмаган дориларни сотган шахслар аниқланиб, қўлга олинди. Бу ҳақда Ички ишлар вазирлиги хабар берди.
Маълум қилинишича, 2025 йил 4 апрель куни мамлакатдаги рўйхатдан ўтган ва сертификатга эга биологик фаол қўшимчалар ишлаб чиқарувчи корхона ходими ҳуқуқни муҳофаза қилувчи идораларга ариза билан мурожаат қилиб, маҳсулотларини сохталаштириб сотаётган шахслар ҳақида хабар берган.
Суриштирув натижаларига кўра, фирибгарлар Instagram, Facebook, Telegram ва YouTube платформаларида “Арзон интернет магазин”, “Онлайн шифо УЗ”, “Шов-шув онлайн шоп”, “Уйда даволаниш” каби каналлар орқали қалбаки дориларни реклама қилиб, сотган.
Аниқланишича, 1995 йилда Навоий вилояти Хатирчи туманида туғилган шахс Тошкент шаҳридаги Учтепа марказида Саll-марказ ташкил қилган ва 1975 йилда туғилган жиноий шериги билан биргаликда сохта маҳсулотларни республика бўйлаб тарқатган.
Ҳозирги кунда уч нафар гумонланувчи қамоққа олинган, яна бир шахсга нисбатан қидирув эълон қилинган. Жиноят иши юзасидан тергов ҳаракатлари давом этмоқда.
