Қирғизистоннинг собиқ президенти Атамбаев давлат мукофотларидан маҳрум қилинди
Алмазбек Атамбаев 2011 йил декабридан 2017 йил ноябригача Қирғизистон президенти лавозимида фаолият юритган.
Қирғизистоннинг собиқ президенти Алмазбек Атамбаев давлат мукофотларидан маҳрум этилди. Тегишли фармон мамлакатнинг амалдаги президенти Садир Жапаров томонидан имзоланди ва президентнинг расмий веб-сайтида эълон қилинди дейди РБК нашри.
Фармонга мувофиқ, Алмазбек Атамбаев “Қирғиз Республикасининг Батири” олий унвони, II даражали “Манас” ордени, “Данакер”ордени ҳамда “Данк” медали каби давлат мукофотларидан маҳрум қилинди. Шунингдек, мазкур мукофотларни бериш тўғрисида илгари қабул қилинган президент фармонлари ҳам бекор қилинди.
Ҳуқуқни муҳофаза қилувчи органларга собиқ президентдан ушбу мукофотларни олиб қўйиш ва кейинчалик давлат мукофотлари жамғармасига топшириш вазифаси юклатилди.
Алмазбек Атамбаев 2011 йил декабридан 2017 йил ноябригача Қирғизистон президенти лавозимида фаолият юритган.
Маълумот ўрнида, 2020 йилда у жиноят оламида нуфузли шахс ҳисобланган Азиз Батукаевни ноқонуний равишда озод қилиш иши бўйича 11 йил 2 ой муддатга озодликдан маҳрум этилган, бироқ кейинчалик мазкур ҳукм бекор қилиниб, иш қайта кўриб чиқиш учун судга юборилган.
2023 йилда Атамбаев жазони ижро этиш муассасасидан озод этилиб, даволаниш мақсадида чет элга чиқишига рухсат берилган. Айни пайтда у хорижда истиқомат қилмоқда.
2025 йил июнь ойида эса у Кой-Тош қишлоғида ерларни ноқонуний эгаллаш, ноқонуний бойиб кетиш ҳамда 2019 йил август ойида содир бўлган оммавий тартибсизликларда иштирок этиш бўйича учта жиноий иш доирасида сиртдан 11,5 йилга озодликдан маҳрум этилиб, мол-мулки мусодара қилинган ва давлат мукофотларидан маҳрум қилинган.
