Қозоғистон тоғларида уч нафар альпинист ҳалок бўлди
Қутқарувчилар 24 декабрь куни бедарак йўқолган уч альпинистнинг жасадини топдилар.
Қозоғистон тоғларида бедарак йўқолган уч нафар альпинистнинг барчаси ҳалок бўлгани аниқланди.
Олмаота тоғларида олиб борилган қидирув-қутқарув ишлари якунланди. Қозоғистон Республикаси Фавқулодда вазиятлар вазирлиги матбуот хизматининг маълум қилишича, 24 декабрь куни содир бўлган фожиали ҳодиса оқибатида ҳалок бўлганлар сони уч нафар альпинистга етди.
Уларнинг жасадлари Локомотив чўққиси яқинида, денгиз сатҳидан тахминан 3 700 метр баландликда топилган. Вазирлик маълумотларига кўра, ҳалок бўлганларнинг барчаси Қозоғистон фуқаролари бўлиб, профессионал альпинистлар ҳисобланмаган.
Қидирув-қутқарув тадбирларига қарийб 80 нафар мутахассис, 12 та махсус техника, 4 та кинология бўлинмаси ҳамда 4 та учувчисиз учиш аппарати жалб этилган. Қутқарувчилар дастлаб бир нафар альпинистнинг жасадини аниқлаган, кейинчалик қолган икки нафар шахс ҳам топилган.
Маълум қилинишича, уч кишидан иборат гуруҳ Тяншан тоғ тизмасидаги Локомотив чўққисига йўл олган ва улар билан алоқа узилган. Шундан сўнг, уларнинг яқинлари Фавқулодда вазиятлар вазирлигига мурожаат қилган.
Топилган жасадлар ҳуқуқни муҳофаза қилувчи органларга топширилган. Ҳолат юзасидан суд-тиббий экспертизаси тайинланган.
