Россияда илк ислом банки очилиши режалаштирилмоқда
Лойиҳа Марказий банк кўмагида ишлаб чиқилиб, банк 2026 йилга қадар иш бошлаши мумкин.
Россияда биринчи ислом банкини ташкил этиш бўйича музокаралар фаол босқичга кирди. Бу ҳақда Давлат думаси Молия бозори қўмитаси раиси Анатолий Аксаков маълум қилди. Унинг сўзларига кўра, лойиҳа бизнес вакиллари ва мусулмон жамоатчилиги билан ҳамкорликда ишлаб чиқилмоқда.
Аксаков ушбу баёнотни Қозон шаҳрида Ислом молия институтлари учун ҳисоб ва аудит ташкилотининг (ААОИФИ) ваколатхонаси очилиши муносабати билан ўтказилган давра суҳбатида билдирган. У Марказий банк ҳам ташаббусни қўллаб-қувватлаётганини таъкидлади ва банкни ташкил этиш ишлари 2026 йилга қадар якунланиши кутилаётганини айтди.
Маълумки, ислом банкчилиги Россияда 2023 йилдан буён тажриба тариқасида Доғистон, Чеченистон, Бошқирдистон ва Татаристонда жорий этилган. Ушбу ҳудудларда фоизсиз молиявий хизматлар ва шариат тамойилларига асосланган операциялар синовдан ўтказилмоқда.
2025 йил ёзида мазкур эксперимент 2028 йил 1 сентябргача узайтирилди ва рухсат этилган операциялар рўйхати кенгайтирилди. Мутасаддиларга кўра, келгусида Россиянинг бошқа ҳудудлари ҳам ислом молияси лойиҳасига қўшилиши мумкин.
