2025 йилда Ўзбекистонга 200 мамлакатдан сайёҳлар ташриф буюрди
Хорижий сайёҳларнинг асосий қисми 31–55 ёшдагиларни ташкил этди.
Ўзбекистон Миллий статистика қўмитаси 2025 йилнинг январ–ноябрь ойларини қамраб олган маълумотлар асосида мамлакатга ташриф буюрган ўртача хорижий сайёҳнинг статистикасини тақдим этди.
Таҳлилларга кўра, жорий йил давомида Ўзбекистонга дунёнинг қарийб 200 мамлакатидан сайёҳлар ташриф буюрган. Умумий кўрсаткичларга мувофиқ, мамлакатга келаётган хорижий сайёҳларнинг асосий қисмини 31–55 ёш тоифасидаги эркаклар ва аёллар ташкил этмоқда.
Статистик маълумотларга кўра, эркак сайёҳлар сони устунлик қилган бўлиб, уларнинг умумий сони 5,85 миллион нафардан ошган. Аёл сайёҳлар эса 4,9 миллион нафарни ташкил этган.
Ёш таркиби бўйича энг катта улуш 31 ёшдан 55 ёшгача бўлган сайёҳларга тўғри келиб, уларнинг сони 5,4 миллион нафардан ортиқни ташкил этган. Иккинчи ўринда 56 ёш ва ундан юқори бўлган сайёҳлар бўлиб, уларнинг сони 2,18 миллион нафарга етган.
Шунингдек, 19–30 ёш оралиғидаги ёшлар сони 1,75 миллион нафарни, 0–18 ёшдаги болалар ва ўсмирлар эса 1,38 миллион нафарни ташкил этгани қайд этилган.
Мазкур кўрсаткичлар Ўзбекистоннинг халқаро туризм бозоридаги жозибадорлиги ортиб бораётганини ва турли ёш тоифаларидаги сайёҳлар учун қизиқарли манзилга айланаётганини тасдиқлайди.
