Эрон Канада ҳарбий-денгиз флотини “террорчи ташкилот” деб эълон қилди
Теҳрон бу қарорни Канаданинг Эрон Ислом инқилоби қўриқчилари корпусини террорчи деб тан олганига жавоб чораси сифатида баҳоламоқда.
Эрон Канада ҳарбий-денгиз флотини расмий равишда “террорчи ташкилот” деб эълон қилди. Бу ҳақда Эрон Ташқи ишлар вазирлиги баёнот берди. Қарор Оттаванинг Эрон Ислом инқилоби қўриқчилари корпусини (ИИПК, ИРГС) террорчи ташкилотлар рўйхатига киритишига жавобан қабул қилингани билдирилди.
Вазирлик баёнотида Канаданинг мазкур қарори халқаро ҳуқуқнинг асосий тамойилларига зид экани таъкидланган. Теҳрон расмийларига кўра, ИРГС Эрон қуролли кучларининг расмий ва ажралмас қисми бўлиб, уни террорчи ташкилот сифатида таснифлаш ноқонуний ҳисобланади.
Эрон ТИВ Оттаванинг бу ҳаракатини “халқаро ҳуқуқни бузиш” деб баҳолаб, жавоб чораси ўзаро мутаносиблик тамойилига асосланганини маълум қилди. Шунингдек, Эрон томони 2019 йилда қабул қилинган ва ИРГСни террорчи деб тан олган давлатларга нисбатан жавоб чораларини кўришни назарда тутувчи миллий қонунчилик нормаларига таянганини қайд этди.
Мазкур қарор Эрон ва Канада ўртасидаги дипломатик кескинликни янада кучайтириши мумкин. Экспертларга кўра, бу ҳолат ИРГС мақоми масаласида Ғарб давлатлари ва Эрон ўртасидаги қарама-қаршиликлар чуқурлашиб бораётганини яна бир бор кўрсатмоқда.
